اسلام آباد: نیب ذرائع نے بانی پی ٹی آئی عمران خان کے گھر کی نیلامی سے متعلق خبروں کو بے بنیاد قرار دے دیا۔
ذرائع کے مطابق عمران خان کی کسی جائیداد کی نیلامی نہیں کی جا رہی اور اس حوالے سے پھیلائی جانے والی اطلاعات حقیقت پر مبنی نہیں۔ نیب کا کہنا ہے کہ عمران خان 190 ملین پاؤنڈ کیس میں پہلے ہی سرنڈر کر چکے ہیں، اس کیس میں ان کی جائیدادوں کی نیلامی کے کوئی عدالتی احکامات موجود نہیں، اور نہ ہی ان کی کوئی جائیداد اس فیصلے میں شامل ہے۔ نیلامی کے احکامات صرف اشتہاری ملزمان کے لیے ہیں۔
ذرائع نے بتایا کہ عدالتی احکامات پر ضلعی انتظامیہ تین جائیدادوں کی نیلامی کر رہی ہے، جن میں موضع موہڑہ نور میں 405 کنال اور 248 کنال اراضی شامل ہے، جن کی نیلامی آج مقرر ہے۔
اس کے علاوہ اسلام آباد کی 3 کلب روڈ پر واقع زمین بھی نیلامی میں شامل ہے، جو مفرور ملزمان کے اشتہاری قرار دیے جانے پر ضبط کی گئی تھی۔