وزیراعظم پاکستان شہباز شریف نے بلوچستان کے سیلاب سے متاثرہ طالب علم اکرام اللہ سے ملاقات کی اور اعزازی نمبروں کے ساتھ میٹرک امتحان میں کامیابی پر مبارکباد دی۔
اکرام اللہ نے راولپنڈی بورڈ کے میٹرک امتحانات میں تیسری پوزیشن حاصل کی، جس پر وزیراعظم نے انہیں وزیراعظم ہاؤس مدعو کیا۔
اس موقع پر شہباز شریف نے کہا کہ اکرام اللہ کاکڑ کا خاندان سیلاب سے شدید متاثر ہوا تھا، ملاقات کے دوران اکرام اللہ نے اعلیٰ تعلیم حاصل کرنے کی خواہش ظاہر کی تھی، اور آج یہ دیکھ کر خوشی ہے کہ وہ محنت اور لگن سے اپنے مقصد کی طرف بڑھ رہا ہے۔
اکرام اللہ کاکڑ نے گفتگو میں کہا کہ میں نے محنت جاری رکھی اور آپ سے کیا ہوا وعدہ پورا کیا، یہ کامیابی آپ کی سرپرستی کے باعث ممکن ہوئی۔ انہوں نے مزید کہا کہ آپ کے نقش قدم پر چلتے ہوئے ملک و قوم کی خدمت کرنا چاہتا ہوں۔
یاد رہے کہ وزیراعظم نے دورہ قلعہ سیف اللہ کے دوران اکرام اللہ سے امدادی خیمے میں ملاقات کی تھی۔