وزیرِ اعظم نے اسرائیل کے غزہ پر قبضہ کرنے کے فیصلے کی سخت مذمت کی ہے۔ انہوں نے اس فیصلے کو "غیر قانونی اور ناجائز" قرار دیا۔ شہباز شریف نے کہا کہ یہ فیصلہ فلسطینی عوام کے خلاف پہلے سے جاری تباہ کن جنگ میں ایک خطرناک اضافہ ہے۔
یہ قدم پورے خطے کے امن اور استحکام کے لیے شدید خطرہ ہے۔ ان کا کہنا تھا کہ فوجی کارروائیوں کی یہ توسیع پہلے سے موجود انسانی بحران کو مزید سنگین بنا دے گی۔ غزہ میں لوگ پہلے ہی بھوک، بجلی، پانی اور علاج جیسی بنیادی ضروریات سے محروم ہیں۔
وزیرِ اعظم نے کہا کہ ہمیں اس المیے کی اصل وجہ، یعنی اسرائیل کا غیر قانونی قبضہ، نظر انداز نہیں کرنا چاہیے۔ جب تک یہ قبضہ ختم نہیں ہوتا، اُس وقت تک خطے میں امن صرف ایک خواب ہی رہے گا۔
شہباز شریف نے عالمی برادری سے مطالبہ کیا کہ وہ اسرائیل کی بلاجواز جارحیت کو فوراً روکے۔ انہوں نے کہا کہ اب وقت آ گیا ہے کہ انسانیت کے لیے مل کر قدم اٹھایا جائے۔